អាស៊ាន៖ លោក វ៉ាង យី (Wang Yi) ទីប្រឹក្សារដ្ឋ និងជារដ្ឋមន្ត្រីការបរទេសនៃសាធារណរដ្ឋប្រជាមានិតចិន នឹងបន្តដំណើរទស្សនកិច្ចផ្លូវការទៅកាន់ប្រទេសសិង្ហបុរីរយៈពេល ២ថ្ងៃ ចាប់ពីថ្ងៃទី១៣ ខែកញ្ញានេះ។ 

ក្នុងដំណើរទស្សនកិច្ចនៅប្រទេសសិង្ហបុរីនេះ លោក វ៉ាង យី នឹងជួបពិភាក្សាទ្វេរភាគីជាមួយថ្នាក់ដឹកនាំកំពូលនៃប្រទេសសិង្ហបុរីរួមមាន ជំនួបជាមួយលោក Lee Hsien Loong នាយករដ្ឋមន្រ្តីសិង្ហបុរី និងលោក Heng Swee Keat ឧបនាយករដ្ឋមន្រ្តីសិង្ហបុរី។ ក្រៅពីជំនួបកំពូលទាំងពីរខាងលើនេះ លោក Wang Yi ក៏នឹងជួបពិភាក្សាការងារជាមួយលោក Vivian Balakrishnan រដ្ឋមន្រ្តីការបរទេសផងដែរ។​ នេះបើយោងតាមសេចក្តីប្រកាសព័ត៌មានរបស់ក្រសួងការបរទេសសិង្ហបុរី។

គួរបញ្ជាក់ថា សិង្ហបុរី គឺជាប្រទេសទី៣ហើយនៃដំណើរទស្សនកិច្ចរបស់រដ្ឋមន្រ្តីការបរទេសចិន បន្ទាប់ពីវៀតណាម និងកម្ពុជា។ ក្រោយបញ្ចប់ដំណើរទស្សនកិច្ចនៅសិង្ហបុរីនាថ្ងៃអង្គារស្អែកនេះ លោក Wang Yi នឹងបន្តដំណើរទស្សនកិច្ចចុងក្រោយទៅកាន់ប្រទេសកូរ៉េខាងត្បូងភ្លាមៗ មុននឹងមាតុភូមិនិវត្តន៍ទៅកាន់ប្រទេសចិនវិញ៕